Американската компанија Tesla претрпе загуба од 408 милиони долари во вториот квартал од годинава и покрај испораката на рекорден број електрични возила.
Оваа загуба, сепак, е пониска од неочекувано големата загуба од 702 милиони долари во првиот квартал, но сугерира дека моделот 3 од оваа компанија сè уште не е доволно успешен да ја извлече компанијата од лошите деловни резултати.
И покрај загубата, компанијата успеа да генерира приходи од 6,3 милијарди долари, додека 117 милиони долари од загубите се припишуваат на трошоците за реструктуирање поврзани со отпуштањата и затворањето на некои продажни места.
Од Tesla, исто така, соопштија дека го завршиле кварталот со пет милијарди долари во готовина, што е најголема сум во историјата на компанијата и резултат пред сè на зголемувањето на капиталот од 2,7 милијарди долари во мај.
Во вториот квартал биле произведени околу 87 илјади автомобили и испорачани 95,2 илјади единици, што, според „Њујорк тајмс“ е зголемување на испораката од 50 отсто во споредба со претходниот квартал.
Компанијата, исто така, соопшти дека долгогодишниот шеф на технологија Ј.Б. Штраубел ќе ја напушти функцијата по 15 години.
Текстот Tesla претрпе загуба од 408 милиони долари во вториот квартал од годинава е превземен од USB.mk.